மான் கறி சுவைக்க விருப்பமா ?

"இந்தியாவில், தமிழ்நாட்டில், ப்ளூ க்ராஸ் ஆளுங்களிடம் சென்று 'நான் மான் கறி தின்றேன்' என்று உங்களால் தைரியமாக சொல்ல முடியுமா ?"

"ஏன் இந்த கொல வெறி ? ஒரு இந்தி நடிகர் மானை சுட்டுவிட்டு, ஒரு ஆண்டு களி திண்ண மாதிரி என்னையும் திங்க வைக்க சதித் திட்டமா ?" ன்னு முந்திக் கொண்டு கேட்காதிங்க.

சிங்கையில் மான் கறி கிடைக்கும், முஸ்தபா பேர் அங்காடியில் மான் கறி விற்கிறார்கள். நம்ம முகவை இராம் குமாரிடம் கேட்டால் அதன் சுவையைச் சொல்லுவார். ஒரு கிலோ மான் கறி சிங்கை வெள்ளி 22 முதல் 30 வெள்ளி வரை விற்குது. நம் இந்திய ரூபாய்க்கு 700ரூபாய் இருக்கும்.

"ஆஹா...! விமானப் பயணச் சீட்டு எடுக்கக் கிளம்பிட்டிங்களா ? கைக் காசை செலவு செய்ய வேண்டாம். நாங்கள் அன்போடு உங்களுக்கு பயணச் சீட்டும் சிங்கையில் ஒருவாரம் தங்கும் இடமும் ஏற்பாடு செய்கிறோம். "


"எதுக்கு அதையெல்லாம் நீங்கள் செய்யனும் ? போன ஜென்மத்து பந்தமா ?"

"அப்படித்தான் வைத்துக் கொள்ளுங்களேன், அப்படி இல்லாவிட்டாலும் கூட உங்களுக்கு நாங்கள் சிங்கை சென்று திரும்பும் பயணச் சீட்டும் ஒருவார தங்குமிடம், சிங்கையின் சுற்றுலா தளங்களுக்கு அழைத்துச் செல்ல முடியும்"

"சிங்கைப் பதிவர்களும் - தமிழ் வெளியும் இணைந்து நடத்தும் மணற்கேணி - 2009 கருத்தாய்வுப் போட்டியில் கலந்து கொண்டு, அதில் இருக்கும் மூன்று பிரிவுகளின் வரும் 29 தலைப்புகளில் ஒன்றைப் பற்றி போட்டி வழிகாட்டுதல் படி கட்டுரையை எழுதி அனுப்புங்க"

உங்கள் கட்டுரை சிறப்பானதாக தேர்ந்தெடுக்கப் பட்டால், சிங்கைக்கு வந்து மான் கறி சாப்பிடலாம்"

"மான் கறி கிடைக்கும்னு சொல்றிங்க .......சரி, யார் சமைத்துத் தருவது ?"

"அதுகெல்லாம் ஆளுங்க இருக்காங்க... மான் கறி 65 அறிவிப்புடன் உணவகங்களே இருக்கு கவலைப் படாதிங்க...... அதுமட்டுமா ? ஆமை, முதலைக் கறி கூட கிடைக்கும்.....ஹலோ ஓடாதிங்க.....அப்படியெல்லாம் உங்களை சோதிக்க மாட்டோம்"

***

"அவர் ஓடியதை விடுங்க எனக்கு சொல்லுங்க....நான் உயிர்களிடத்து அன்பு செலுத்தும் ஜீவ காருண்யம் போற்றுபவன்...போட்டியில் கலந்து வெற்றிபெற்றால் நானும் மான்கறி திங்க வேண்டும் என்று வற்புறுத்துவிங்களா ?"

"உங்களை வற்புறுத்த மாட்டோம், உங்க பங்கை சிங்கைப் பதிவர்களே பகிர்ந்து கொள்வாங்க, உங்களுக்காக அறுசுவை சைவ உணவுகளுக்கு கோமளவிலாஸ், ஆனந்தபவன், நம்ம இராஜகோபால் அண்ணாச்சியின் சரவண பவன், முருகன் இட்லி, பெங்களூர் சாகர் இன்னும் பலப் பல சைவ உணவகங்கள் இருக்கிறது."

"நான் கூட சைவம் தாங்க,......நம்புங்க...."

***

"இப்ப சொல்லுங்க... சிங்கை வந்துவிட்டு சென்ற பிறகு இந்தியாவில், தமிழ்நாட்டில், ப்ளூ க்ராஸ் ஆளுங்களிடம் சென்று 'நான் மான் கறி தின்றேன்' என்று உங்களால் தைரியமாக சொல்ல முடியும் தானே ?"


மணற்கேணி - 2009 தொடர்பில்
அன்புடன்
கோவியார் (எ) கோவி.கண்ணன்